CLUB DE ADULTOS: OS ELEFANTES DE SOKÚROV

 O pasado 29 de xaneiro o noso Club de adultos reuniuse para comentar Os elefantes de Sokúrov. 

 Janis, unha rapaza de 30 anos e cun expediente brillante, espera que se convoquen unhas oposicións ao ensino. Mentres, fai crítica de cine e coida de varias anciás nun edificio de Santiago. Todas as mañás almorza nunha cafetería onde observa como un descoñecido le e escribe sen descanso. Un día ese descoñecido desaparece e Janis o atopa casualmente nun hospital. A partir dese momento, Janis comeza unha viaxe de autodescubrimento que a leva á súa nenez, á xuventude dos seus pais, aos movementos xuvenís e, sobre todo, a descubrir un enigma que marcou a súa vida.

  Foi esta unha novela que espertou opinións moi variadas entre os participantes á sesión. Case todos gozaron coa fantástica presentación que fai o autor sobre Santiago no presente e no pasado de Janis. Tamén foron favorables os comentarios sobre a análise da crise socioeconónica da época: a precariedade laboral, os desafiuzamentos, os problemas da xente anciá ou a pobreza nas rúas. No obstante, unha parte considerou que a presentación da situación dos maiores resultaba excesivamente dura, como tamén lles pareceron dolorosas (que non innecesarias) as continuas alusións aos problemas de saúde mental dos personaxes da novela.