Club de Lectura IES Saturnino Montojo

  Xestionado polo noso Club de poesía, Antón Cortizas visitou ao noso alumnado máis novo con intención de crear canteira e espertar vocacións poéticas.  A actividade permitiu un achegamento lúdico a un xénero literario tan minoritario como o lírico e resultou de agrado para as nosas rapazas e os nosos rapaces, que se converteron en pequenos-grandes poetas por un día.

 Durante o presente curso académico, o noso Club de manga de bacharelato reuniuse o segundo e o terceiro venres de cada mes durante o segundo recreo.  Dado que todos os participantes son vellos coñecidos porque xa formaron parte do Club durante cursos pasados, foron eles mesmos os que se encargaron de deseñar e organizar as actividades.    En primeiro lugar, encargáronse de compartir información sobre as súas últimas lecturas de manga proporcionando a súa valoración sobre as situacións que se narraban, sobre os valores máis destacados dos personaxes ou sobre os temas que se trataban en cada obra.    En segundo lugar, presentaron de forma crítica as novidades en anime e, sobre todo, realizaron unha comparativa entre as obras de manga e a sua versión cinematográfica.    

 

 Para concluír as reunións do Club de adultos escollemos Prisioneros en el paraíso , unha das novelas máis coñecidas do escritor finlandés Arto Paasilinna.   Esta narración parte dun acontecemento catastrófico: un avión no que viaxa unha misión da ONU ten que aterrar de emerxencia nun recuncho perdido do arquipélago indonesio. A partir dese momento, os superviventes (un grupo de enfermeiras suecas, comadroas e leñadores finlandeses, médicos noruegueses, azafatas e pilotos ingleses) vense obrigados a sobrevivir nun ambiente hostil. Neste caso a novela non gustou a todos os participantes. Algúns deles aseguraron que o tema non lles resultou interesante e outros manifesaron que o estilo do autor non lles permitiu engancharse á lectura. Non obstante, aqueles e aquelas que si desfrutaron coa obra destacaron o humor negro que impregna o escrito e, sobre todo, a intención crítica de Paasilinna, que ironiza sobre os excesos relixiosos, sobre as bondades do socialismo, sobre o papel...

    Durante o terceiro trimestre os participantes no Club de narrativa de 4º ESO escolleron dúas lecturas: O vixía no Centeo , de J.D. Salinger e Morning Star, de Xosé Miranda.   A segunda das novelas, Morning star , é un fantástico relato de aventuras herdeiro da Illa do tesouro no que un protagonista en primeira persoa conta a súa azarosa vida dende a súa infancia na taberna de Verducido ata que consegue casarse co seu amor, Helena.   

 Para concluír as nosas reunións do Club de narrativa de 1º ESO escollemos a novela de Jordi Sierra i Fabra: Kafka y la muñeca viajera .     Recolle esta novela unha anécdota real. O escritor Franz Kafka atopa nun parque a unha rapaza chorando amargamente pola súa boneca perdida. O autor, conmovido polo pranto da pequena, inventa unha historia: a boneca está realmente de viaxe e el é o carteiro que se encargará de entregarlle as súas cartas á nena.    A partir desta historia simples, os nosos lectores máis novos puideron reflexionar sobre cuestións diversas como a relación entre os nenos e os adultos, a inocencia da infancia, a importancia da bondade nas relacións persoais e, sobre todo, o papel da fantasía para aceptar mellor a realidade que nos rodea.